當年今日

青心直說:炒林業改革見好就收 - 胡孟青

蘋果日報 2009/08/17 00:00


近月中央冇再推出新的產業振興規劃,中港兩地股市一樣NaturalHighNaturalBuy,最新有溫爺爺於6月22日高調提出、再於昨天出版的《求是》雜誌中發表重要文章《高度重視林業的改革和發展》,相信市場又有新藉口翻炒。
綜合內地媒體之解讀,呢次改革目的首要係提升內地林木業效益。因為目前內地43億畝林業用地、8億畝沙地和6億畝濕地,加起來面積比耕地多30倍,但產出率只係農地1/30。溫總相信,若然可以釋放呢啲增值潛力,將有助增加農民收入,從而拉動內需,振興經濟。
繼十大振興產業後,中央似乎苦無良方,終於要落實埋林木業改革。但較令人摸不着頭腦,係中央打算喺2020年達到全國森林覆蓋率23%目標,一方面要保育樹木,另一方面卻放寬採伐林木的審批及配額,並增加對有關行業信貸投放,提供不同程度補貼及稅務寬減。
行業基本因素未改善
既然中央「翻叮」救林木業,即時令人想起中國林大(910)、三林環球(3938)及兩儀控股(094)。先睇股價走勢,梗係兩儀跑出,因為市場憧憬佢大股東嘉漢林業會注入內地森林資產,加上去年佢打算蛇吞象,以40億元購入江西同福建約10萬公頃林地。雖然兩儀市值只有5億幾,但以佢粒粒巨星嘅大股東背景(包括和黃前大班馬世民、淡馬錫、富達等),股價表述,呢單唔似係流料。
能否子憑母貴,先睇後台。嘉漢林業除咗喺內地第一大林木區雲南有6萬公頃綠林之外,遠至黑龍江、近至廣州等8處加起來林木面積達34萬公頃,去年銷售1000萬立方米。唔好俾啲數「拋」到,其實同林大嘅50萬、三林嘅400萬公頃比,仍有距離。
鬥多樹,就好似比較內房股土儲,其實最緊要仲係睇市場供求,到底有無機會令佢哋短期內轉虧為盈。睇番內地另一大林業股永安林業,半年盈利大跌33%,主要係因為房地產同家具市場需求急速回落,令市場競爭加劇,減價戰打到索晒氣。
論投資價值,即使係樹多嘅林大,全年轉蝕4億幾銀,可見行業基本因素未見明顯改善,炒林木股宜見好識收。反而喺新政策下,中央將推動農業保險,以上半年全國農險保費增近60%的勢頭,中國財險(2328)或有機會開闢一條新血路。
胡孟青