上年奧斯卡頒獎禮最佳電影頒錯獎，成為一大笑話。但有指今年頒獎嘉賓華倫比堤（Warren Beatty）同菲丹娜蕙（Faye Dunaway）將會再接再厲，於今年第90屆頒獎禮中再頒最佳電影獎。佢哋噚日仲專程去到現場先綵排好對答。

上年因為工作人員遞錯信封，令二人錯誤宣讀最佳電影為《星聲夢裡人》（La La Land），發現擺烏龍後大會先更正為《月亮喜歡藍》（Moonlight），今次可以預計兩位嘉賓會自嘲，仲打算宣讀《亂世佳人》（Gone with The Wind）為最佳電影咁話！另外大會會更謹慎，嚴禁手持信封嘅會計師用電話，以免分心。

另外，日前亦有報導指當晚送俾嘉賓嘅禮物包超豪，一份禮物包就總值108萬港元，入面包括12日坦桑尼亞旅行禮卷、鑽石頸鍊、夏威夷一星期豪華酒店住宿，另外仲有喇叭、化妝品等等大量名貴禮物，夠晒豪爽。

精選娛聞，喺晒《娛果》
http://fb.com/appledailyent