苗僑偉（三哥）59歲生日，噚晚喺灣仔搞生日P，好友曾志偉、馬德鐘、吳卓羲、張兆輝、黃宗澤、高海寧、鄧智偉同樂易玲等均到賀。

由噚晚7點幾玩到今日凌晨12點幾，賓客先陸續離開，凌晨1點35分，Bosco一支公走，問佢咁夜離開?黃宗澤笑住講裡面啲人留得仲夜，就坐咗上私家車走。

凌晨1點40分，志偉同一班友人步出，問到佢今次飲得多唔多?志偉話：「冇呀!唔敢飲太多，因為聽日要做嘢。」佢話個生日P氣氛好開心、好瘋狂，之後志偉上七人車走，難得今次冇醉、冇腳步浮浮。之前佢出席派對，不時盡興而歸，醉爆要人抬走。

隔咗5分鐘，梁烈唯出嚟，佢就話大家開心飲咗啲酒，成班人有一齊唱歌，自己唱到聲都沙埋。