韓國男團Super Junior(SJ)將於下月8號到澳門為佢哋嘅迷你專輯《One More Time》宣傳，而成員崔始源就趁去澳門前，日前就飛到台灣出席品牌活動。

始源噚日着上型爆西裝喺台中現身手錶品牌嘅活動，即時吸引500名台迷到場，始源喺台上全程以中文回應傳媒及問候粉絲，關心粉絲問：「不用上學嗎？｣、「吃飽了嗎？」又大讚台中人很熱情及善良，自己亦都很懷念台灣的美食。

提到手錶選擇，始源都有唔少考慮因素，不過佢就暫時仲未有送錶畀女性嘅經驗，當問到會送錶畀邊個時，一向孝順嘅始源就話第一個會送畀媽咪，跟住就會送畀未來女友同埋一位女性朋友，佢仲搞笑話：「最後一個先送畀我妹妹，應該係佢男友送錶，若冇男友先由我買。｣

始源出席活動後今日返韓，雖然始源於飛機起飛前20分鐘先到抵候機室，但早已經有粉絲喺候機室等待見偶像多一面。始源見到送機粉絲及媒體時都有揮手示意，更收咗粉絲送嘅嘅卡片，喺經過玻璃門時，始源更以普通話提醒大家「小心喔！」，十分親民有禮。

更多韓流，喺晒《娛果》
http://fb.com/appledailyent