趙哲妤（Uny）、筱靖、莊端兒、李綺雯等噚晚喺沙田出席國際年青才俊交流協會活動。趙哲妤、端兒、筱靖三位好友一齊接受訪問，話明才俊晚宴，大好時機識男仔，趙哲妤話：「平時都係啲才俊認識我哋多，今晚好多飲食界人嚟參加，有興趣過嚟睇下有冇商機，工作還工作，愛情還愛情。」筱靖就話原本喺新加坡慶祝生日，提前返港撐好姊妹一齊出席活動。問到生日同咩朋友一齊到外國？佢笑話：「唔話你哋知，八卦。」

Uny嬲咗筱靖一年，所以冇同對方慶祝生日，原因只係有次兩人去到外地，筱靖擺低咗Uny畀佢一班男性朋友照顧，筱靖解釋：「我哋去美國玩，自己有班朋友喺嗰邊，join咗啲朋友去第二個地方玩，第二日再會合佢哋，我用心良苦製造機會畀Uny同我啲朋友，點知佢就嬲足一年，要我擺和頭酒，又請咗佢去東莞旅行先原諒我。」Uny對筱靖好意唔領情：「我鍾意嘅男仔係高大型，但係佢嘅朋友就係商人多，外表同我唔匹配，唔使叻最緊要靚。」莊端兒就話嚟緊學習做生意，睇下會唔會識到合作夥伴，唔排除任何緣分。

另外，李綺雯就話冇諗住識男仔，嚟緊會搞生意，喺泰國引入咗隻米餅做代理。問到投資幾多錢？佢話：「計緊，但我好鍾意食呢隻米餅，即使入咗貨賣唔出都唔緊要，自己可以食晒佢，對呢個產品有信心。」李綺雯近日經常開live講飲食，佢笑話：「因為我好大食，平時同朋友打邊爐食到人哋放低晒筷子熄晒爐，我轉頭都可以食晒啲嘢，細個媽咪話我大食食窮郎，我同媽咪講我養得起自己就得啦。我成日肚餓，要靠自己令自己食飽。」

精選娛聞，喺晒《娛果》
http://fb.com/appledailyent