TVB播緊嘅新劇《她她她的少女時代》，演失婚婦人嘅田蕊妮一個獨撐大旗，題材新鮮，加上改咗個好名，劇中又講中唔少中女心聲，所以幾受班OL歡迎！以阿田收放自如嘅演技，對住李思捷、曹永廉兩個主要男演員，真係冇難度，有阿田呢個power woman撐得住。

雖然阿田出名好戲，但其實拍完《她她她的少女時代》之後，佢成年冇拍過劇架！據知因為大台依家力捧廿靚歲嘅港姐上位，而今年已經41歲嘅阿田，對大台黎講已經係高齡花旦。加上近年大台要縮減生產，令到佢更加少機會開工。

不過爭氣嘅佢，就算不受重視下，依然憑住喺《她她她的少女時代》嘅表現，令個劇有口碑，網民鍾意。

不過呢個劇一出，久休嘅佢又遇上香港白色恐佈，令佢一度喺宣傳上被消失。有指因為阿田之前喺個人社交平台，就特首記者會而寫上後感:「我依家開個記者會宣布一陣間會有一個記者會，嗰個記者會嘅內容係聽日會有一個記者會⋯⋯⋯」暗寸林鄭下，惹嚟部份內地網民批評，仲話要封殺佢。

雖然《她她她的少女時代》有喺香港搞過一次劇集宣傳，但官方微博，主角阿田就被消失！對於自己喺劇集宣傳被消失一事，佢就話：「呢個我唔知，可能要問返公司。」

冇新劇孭，阿田都唔係樂得清閒，事關9月佢會喺旺角麥花臣開個人演唱會。為咗今次表演，佢好畀心機練歌同結他，仲請咗退咗休嘅老竇做嘉賓。不過，阿田就話個唱會似「棟篤笑」，佢呢排都忙住度稿，其實佢唔使擔心啦！度唔掂，叫老公杜汶澤幫拖咪得囉！

9月2日起升級條件將更新 繼續每月撐壹仔 講真心話撐住我香港！