【新增影片】
祥益地產總裁汪敦敬今日撰文題為《樓價隨時可跌一成》，他剛才接受訪問回應，對大市睇法無變，認為樓價上升過程分龍市(即升市)1期及2期，龍市1期進取上升，龍市2期是合理調整，鞏固後再上。現在太多人太睇好樓市，甚至乎有人認為贏梗，忽略市場發展的必然過程——「鞏固」。在無下跌的心理準備下，當市場出現調整時，有啲人會恐慌，無做足夠準備入市的人，就算做咗啱的決定都會令到個結果變錯!所以撰文提醒準買家。

他重申，維持今年樓價升幅比去年為多，但升市過程中要做好心理準備，「因為買樓唔係一個一帆風順嘅賺錢遊戲，買樓要堅持，過程要鞏固後，樓市先會上，想提醒盲目入市嘅人做好心理準備。當然我認為樓價長遠會上升，從無修改，但發覺好多人無心理準備，覺得有責任提醒無準備嘅人。」

他坦言：「我始終都是一個地產代理，係前線接觸好多客，好多人係不假思索買樓。早兩年講樓市向好呢，好輕鬆，因為啲人好多質疑，越多質疑，我越放心，因為佢質疑者係佢諗清楚啦!但今年要好小心，越來越多人係不假思索覺得樓價上升，雖然樓價向上的因素是存在，問題係新常態有新風險。風險唔會唔存在，如果資金大量從本港流出，呢個咪新常態嘅風險囉!當然暫時未見呢個風險出現住。」

新常態，市場參與者心態都不能同日而語。他舉例，睇下股票騰訊(700)股價，原來贏得多嘅人，更有能力去止賺，止賺風氣形成，以前不嬲覺得業主賣樓梗係唔點啦，但而家係業主掂都會賣樓，因為佢有更好的部署。過去幾年細單位上升，呢啲好多業主或會轉投大單位，或其他範疇，業主有錢咗，啟動另一層購買力。購買力越來越多，遇到新訊息，例如中美貿易戰、新資金流動睇唔通時，就會採取止賺，結果?你會發覺業主會減價。

他解釋：「在業主減價，如果用舊觀念，你梗係覺得佢唔掂，可能等佢再減多啲，但其實唔係，減價原來係短暫，完咗之後會再升返。好似騰訊跌到405元後升返。新秩序，少泡沫，樓價上升時，唔好當牛市3期，覺得轉勢，等佢再跌多啲先入市，結果錯過入市時機，我唔係單方面唱好，賺錢過程要處理風險，同埋識得同風險相處。樓價跌唔好害怕，鞏固後會重拾升軌，更加重要是入市前，要有跌一成的心理準備。如果唔係父幹一族會怨阿爸買層樓俾佢去負債，咁就唔好。」