【第32屆香港電影金像獎頒獎禮之賽前審視】低俗與否先別論藝術成就，不涉生死一切已無傷大雅。

毫無疑問今年是電影《低俗喜劇》的一年，成本少收效大票房獲利，更獲今屆香港電影金像獎多項提名。拜藝發局跟賈選凝曲線合作支持，令這部去年8月上映的電影再獲關注，有機會成為今晚金像獎的大贏家。杜汶澤以候選影帝身份，拆解這個低俗效應。

做電影其實重點是就算低俗，也不可以「俹簁（音乸西）」，即是杜汶澤片中所講「輕率、冇責任感、求其同是但」。

撰文：何永寧

今年可以說是低俗年，《低俗喜劇》製作費不過八百萬左右，十二天拍攝，其間靠飛紙仔完成，依然於今年香港電影金像獎取得五個主要獎項提名，結果會在今晚揭曉。憑《低》片獲提名最佳男主角的杜汶澤，為此片成功下了注腳，他日前接受本報記者專訪說：「香港回歸十幾年，政治經濟都受內地牽制，𠵱家連娛樂都要睇埋好多合拍片，好多擺明淨係拍畀內地人睇，爭在冇喺海報寫住『香港同胞勿看』啫！物極必反，突然有套咁抵死嘅電影，啲人梗係鍾意！」

保護本土意識

電影成功，阿澤覺得同時反映了一個時代性，他說：「《低》片係反映一個年代嘅作品，唔係話香港人低俗，只不過代表香港人被壓迫得太耐啫。」他舉例說：「07年拍《破事兒》又係粗口又剩，唔收得，即係代表乜嘢？代表呢幾年香港人谷得好犀利，真係要發洩！佢哋受夠喇，想要番啲好香港嘅戲，同埋覺得有啲本土嘢要保護。」
阿澤自認低俗，只有不成熟的人才會扮高尚、充文藝：「我好細個嘅時候就鍾意去藝術中心睇藝術電影扮高深，因為思想唔成熟，成日想扮大人咪會咁囉，到心智成熟已經冇咁做。你問我係咪講緊賈（選凝）小姐？哈！你唔講我都差啲唔記得佢！至於係咪要多謝佢令人記得套戲？我唔敢講，我只係知畀着我好似佢咁後生嘅時候，如果有得五萬蚊，我殺人都敢，就係咁簡單。」經過賈選凝在金像獎投票期間的曲線支持，多少引起一班評審的注意，在最佳電影提名中跟《車手》成為奪標的兩頭馬車。

讚城城夠量度

低俗話題豐收，阿澤亦游走低俗與華麗之間，先憑《DIVA華麗之後》成為電影評論學會影帝，今晚又憑《低俗喜劇》角逐香港電影金像獎最佳男主角，論得獎機會他打了個比方：「你話如果郭富城入到圍男主角，我就唔會去，因為明知冇機會，佢入唔到又唔同咁講，我會坐定定睇吓有冇機會攞獎喇！」他指郭富城在《寒戰》的角色難度不單在性格上，還在於本身的氣量：「當你見到對手梁家輝咁搶，好難忍住唔做多啲搶番啲戲，成件事就會over。阿城冇咁做，佢淨係做足本份，嗰份氣量唔係人人做到，影帝係要有呢份量度。我做配角出身好清楚呢樣嘢，配角就係要搶，主角忍唔住鬥搶就破壞套戲。」對於《低》片拍檔鄭中基及陳靜分別獲提名男、女配角：「佢哋應該冇問題，最佳電影就真係要爭吓。」

受完閒氣　港仔開戲出火

杜汶澤拍《低》片源於憑《人間喜劇》出席意大利的烏甸尼電影節，跟他一起出席的還有粵語片時代的著名導演龍剛，有晚他們一起在餐廳閒話家常，講起香港電影業的近況，阿澤說：「我同龍導演講，𠵱家香港好淒涼，冇人睇我哋拍廣東話片。」原本是訴苦博同情，換來的是龍導演語重心長的忠告：「我拍戲嗰陣個個都拍國語片，得我拍廣東話片，不過我拍戲好多人睇喎！會唔會你哋拍嘅戲唔好睇呀？」阿澤自言一向面皮都算厚，都即時面紅不懂回應，內心不忿多少令他決心拍一部有人欣賞的廣東話片。

見識廣東power

恰巧之後導演彭浩翔跟內地導演何念因電影版權展開罵戰，被調侃普通話都說不好沒資格說話。事後二人在冰天雪地的北京吃飯，阿澤說：「兩個香港仔受閒氣，無所事事忽發奇想，把鬼火，彭浩翔話：『就拍一部粗口爛舌嘅廣東話片，放喺網上面播，等佢見識吓廣東話power！』我話係就拍電影啦，電影人梗係拍電影啦！」
電影的成功令他們覺得有點意外，阿澤說：「邊有咁叻計數吖？純粹拍嚟自己開心！」

《低俗喜劇》今晚叫五飛

被賈選凝嗤之以鼻的《低俗喜劇》，諷刺地在今晚舉行的金像獎頒獎禮中叫五飛。到底能捧走多少個獎、電影是否「狹隘的精神勝利法」便有答案。

最佳電影

《低俗喜劇》
《車手》
《消失的子彈》
《逆戰》
《寒戰》

最佳編劇

彭浩翔、林超榮、陸以心《低俗喜劇》
彭浩翔、陸以心《春嬌與志明》
羅志良、楊倩玲《消失的子彈》
梁樂民、陸劍青《寒戰》
麥兆輝、莊文強《聽風者》

最佳男主角

杜汶澤《低俗喜劇》
梁家輝《寒戰》
張家輝《大追捕》
梁朝偉《聽風者》
劉青雲《消失的子彈》

最佳男配角

鄭中基《低俗喜劇》
廖啟智《消失的子彈》
林家棟《寒戰》
杜汶澤《DIVA華麗之後》
萬梓良《懸紅》

最佳女配角

邵音音《低俗喜劇》
陳　靜《低俗喜劇》
江一燕《消失的子彈》
金燕玲《逆戰》
范曉萱《聽風者》

想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/