𠵱家時興唔生仔養寵物，貓狗嘅愛仲可以慰解寂寞芳心。噚日傅明憲（GiGi）同宣萱喺荃灣出席亞洲動物基金「狗大使」嘉許禮，佢哋不約而同話屋企有四隻狗，可以寄託感情。
傅明憲話自己新年喺屋企同啲狗過，佢話：「冇寂寞，我好開心幫四隻狗織冷衫，又封壓歲錢畀佢哋放喺枕頭底。」新年流流，問佢有冇去探吓現遭還押嘅老公葉劍波？佢話：「唔講呢個topic喇，總之一個人生活啦，我啲感情去晒啲狗度。」問傅明憲生活開支會唔會成問題？佢話：「出錢出力做事，唔使好大支出。」
傅明憲唔肯講𠵱家係咪分居，定辦緊離婚，只係話過去兩年都係一個人生活，佢話：「總之我兩年嚟都係一個人同啲狗住，多謝身邊朋友支持。」

宣萱賀健仔做老竇

至於宣萱屋企都有四隻狗，佢噚日攬實啲得獎狗醫生，話情人節都係陪狗仔，佢話：「乜都冇，喺屋企同四隻狗一齊過，一向都係咁㗎啦，我心急嘅階段已經過咗，唔一定要拍拖。」問佢係咪叠埋心水做老姑婆？佢笑話：「個天要你做都冇計，緣份嘅事好難講，𠵱家女人都好獨立。」佢仲恭喜張衞健同張茜有喜，佢話：「都替佢好開心，我都鍾意小朋友。」