燒鴨男　針孔攝維園

蘋果日報 2011/04/27 00:00

AppStore內有關影相的apps，數量驚人，甚麼懷舊感覺、多格拼貼、LOMO效果乜都有。一部手機有齊千奇百趣，係威係勢。不過，家陣有人玩showhand，大你一隻燒鴨……針孔相機，問你點頂？

記者︰吳美美
攝影︰周旭文、部份照片由LCX提供
aboutMartinCheung
中文名張震揚，78年香港生，修讀攝影藝術，2001年於澳洲維多利亞藝術學院榮譽學士畢業，主修純藝術攝影系。張氏最為人津津樂道的針孔作品，是將燒鴨轉化為針孔相機。他在墨爾本唐人街所拍下的概念性作品《DuckCam-Melbourne》（2001），更成為美國「針孔資源中心」收藏品之一。
empty
■「選擇針孔攝影是因為挫敗相對少，因為點都會曝到啲嘢。」
empty
■相片拍攝實地原貌
empty
■《DuckCam-Melbourne》（2001）
想高調？想低調！
你搞清楚何謂燒鴨針孔相機未？並唔係你影出嚟嘅影像似一隻燒鴨，而係負責影嗰部相機係由一隻燒鴨製成。唔makesense？講笑？Comeon，香港人，幾時想像力變到好似iPhone個芒咁細？事實上有此想法的人，十年前即2001年已經喺墨爾本唐人街做過一次，只不過2011年喺香港維園再翻炒一次。
是日約了Martin於LCX做訪問，他的打扮是橙Tee黑褲黑背包。訪問以傾偈形式進行，但小記預設的問題並沒有大作為。原因是，他選擇用燒鴨製作針孔相機，想必此人定愛makenoise，因為心目中做藝術、做創作的只有兩種人：一是沉默地幹，一是好嘈地幹。最初認定Martin是後者，但原來他覺得自己是前者，「十年前做咗，但之後一路無做到嘅原因係，唔想大家覺得做燒鴨好得意，令到啲人知我係乜水。之後返到香港喺LOMO做sales，好怕被人知道之前做過乜，唔想人哋知道我就係做燒鴨相機嘅人，懶係好低調。」有時做人係矛盾的，Martin為想俾人知道針孔攝影係乜，亦有去學校如莊啟程書院示範，但又唔想長期以燒鴨揚名。明白的，如果唔係，你應該一早搞了燒味拼盤相機展。
empty
■為今次展覽製作的單張都可以摺成針孔相機。（http://www.youtube.com/watch?v=bjSkQK4sU0Q）
empty
empty
empty
■Martin親身買鴨，一睇就知邊隻好定壞。
empty
■觀眾用相機影低證據，燒鴨相機真有其事。
我想代入一隻鴨
十年前第一次以燒鴨針孔相機紀錄澳洲墨爾本唐人街，若果當日我是一位老外行經於此，見到Martin以燒鴨拍照，我腦裏會浮現「原來Chinese真係好愛食燒鴨！」成件事完全被標籤咗。但其實「標籤」兩字，好大程度是Martin創作的原念：「未去過印度的人，都會覺得當地人都是食咖喱，就好似當時我在餐館所接觸的白人，都有個想法，例如中國人都是食炒飯、飲豆漿、食燒鴨，所以我覺得燒鴨同我share咗好相似嘅身份。我都有諗過用燒豬、油雞，但其他嘢好難做到，尤其滷水的紅又唔同燒味的紅。我覺得燒鴨就係MartinCheung的隱喻，所以想知道燒鴨對唐人街係點睇。」呢種虛無的代入，你同我都時有發生，最多你只係諗到將自己代入徐子淇或謝霆鋒，而唔係一隻燒鴨。
未完，Martin仲講到另一層意義：「成日聽到話影相要人機合一，件事講到好似武俠片咁，對於呢種咁浪漫化咁誇大，將攝影師咁英雄化嘅描述我唔係咁認同。攝影師無疑係重要，但比起將火箭升上太空，重要性就無咁勁。所以我就想開一個玩笑，相機同人點樣合一，唯一方法就係食咗部相機。」每次用完燒鴨影相之後，佢都有將燒鴨食落肚，而佢成個活動的過程最concern的，都係睇觀眾敢唔敢食隻鴨，所以期間佢非常之咁保護隻鴨！
empty
■針孔相機效果好易做到，拎咗同行攝記DC即場曝光拍照，成品如此。
燒鴨男出動
empty
Step1
當然係準備一隻燒鴨。
empty
Step2
擺定所有用具如銅片、剪刀等。
empty
Step3
先在紙上扎一個窿，準備用作後期的針孔。
empty
Step4
開始製作鏡頭。
empty
Step5
量度鴨前至後的距離，以毫米計算確保相片光暗。
empty
Step6
打開鴨的尾部看看是否能輕易地將相紙放入。
empty
Step7
出發去維園擺陣啦！
empty
Step8
先綁緊燒鴨為怕影響曝光。
empty
Step9
要抹抹鴨油，以防流到相紙上影響曝光。
empty
Step10
可以開始曝光影相，曝光長短要視乎天氣。
empty
Step11
走入黑房曬相，等候中……
empty
Step12
有相睇！
empty
Step13
滿足視覺後再滿足個肚。
empty
沒有相作的相展
若果大家有意步Martin後塵，拎隻燒鴨相機看世界，其實過程非常簡單：「只係準備15分鐘，拮個窿擺塊銅片入去佢個肚，再走入黑房擺入相紙，就可以走去維園影相。但都要視乎天氣而影響曝光。」咁點解用燒鴨整針孔相機最好呢？「首先內裏係密封空間，叉燒就唔得。然後鴨身嘅紅，係好似入咗黑房咁，紅色燈光底下，黑白相紙唔會曝光，所以燒鴨嘅紅就最實用。」
展覽分兩個部份：內部係Martin過去十年製作的部份相機原型，外部是十四位針孔攝影師的作品。留意，展覽中並無Martin的相作。原因？要低調。
empty
■Martin極力叫我多介紹場內的攝影作品，可惜篇幅有限呀！
empty
■展覽內放了部份Martin自家製作的針孔相機。
empty
empty
■十四位針孔攝影師作品，呢種咁被動嘅攝影其實都幾好玩。
MartinCheung針孔相機原型展
地址︰銅鑼灣名店坊京士頓街9號LCXArtGallery
日期︰即日至5月2日