黃秋生昨日以藝術總監、編劇及演員身份，在大角嘴出席舞台劇《夕陽戰士》記者會，同場出席包括有劇團總監甄詠蓓、導演方俊杰，演員鄧智堅、張銘耀、邱頌偉及馮志佑。黃秋生在活動上獻唱英文歌曲《Stand by me》，又高舉該劇名的黃色直幡，秋生笑言：「原先掛喺獅子山頂。」今次秋生在劇中飾演一個「骨灰龕」，他笑說：「真係㗎，一開始真係死咗，跟住係攞個骨灰龕出嚟，後來有出現喺嗰啲幻覺同夢境。」不過秋生坦言不覺得「唔老利」，他笑說：「冇乜所謂喇，我哋嗰啲極地反擊，冇話老唔老利。」

赴兒子畢業禮

舞台劇將於7月上演，秋生目前仍然努力搞劇本，他說：「噚日搞劇本到12點，未搞完，一陣再搞，寫埋聽晚，夾多次，後日執行李走，我會先去英國配音，再去美國探個仔，變咗我要擺低劇本，講低晒啲嘢等佢哋排咗先，我啲戲份唔係好多，主要係佢哋，交帶低晒所有嘢，等我返嚟就搞咗一半。」秋生還說：「佢哋好好，唔激氣，好有創意，只不過係我寫嘢有自己嘅風格同自己嘅諗法，所以一定要話畀佢哋聽，究竟我喺呢啲嘢諗緊乜嘢，交帶原意係咁！」
秋生此行會在英國逗留8日，美國逗留10日，問到會否與阿仔慶祝父親節，他說：「返咗嚟喇，行完畢業禮即刻走，等咗呢一日好耐，以前後生有個銀行廣告，我個仔嗰個，對我好大影響㗎，𠵱家終於有機會，我哋會周圍行，真係好耐冇試過一齊。」再問有否準備禮物送給阿仔，秋生說：「乜都有喇，咁多年供書教學！」會否希望阿仔送個「新抱」給他，他說：「呢啲唔使諗，講親都嗌交，前兩日又話我提佢，叫我唔好提佢，唔講、費事。」至於阿仔會否回港工作，他則說：「唔會返喇，返嚟做咩？都習慣唔到，始終嗰邊機會多啲。」
採訪：張俊銘
攝影：陳俊強