第73屆金球獎頒獎禮將於後日舉行，觀眾最關心影帝影后花落誰家，不過今年無論是戲劇組還是喜劇組都競爭激烈，充滿變數。

於前一屆憑《情迷藍茉莉》（BlueJasmine）奪戲劇組金球影后嘅姬蒂白蘭芝（CateBlanchett），今次喺《卡露的情人》（Carol）中飾演50年代為性向而離婚嘅高貴婦人，再次獲影后提名。佢一方面同朗妮瑪娜（RooneyMara）飾演嘅年輕售貨員擦出愛火，另一方面又因同性戀被丈夫冠以不道德罪名，而去爭女兒的撫養權。姬蒂舉手投足都散發出攝的魅力，與朗妮產生微妙誘人的火花，朗妮嘅青澀感襯托出姬蒂嘅老練，兩人於戲中更有半裸露點床上戲。

不過姬蒂的勝算並非一面倒，今屆有幾位新晉後輩威脅到姬蒂。特別係《布魯克林之戀》（Brooklyn）21歲嘅茜爾莎羅倫（SaoirseRonan）及《抖室》（Room）26歲嘅BrieLarson。兩位輪流在各個影評人協會奪影后殊榮。
茜爾莎喺《布》扮演50年代愛爾蘭年輕女子面對遠距離戀愛，佢隻身赴美國追尋更好生活並墮入愛河，卻因家人關係而要留下愛人返回家鄉。

至於《抖室》題材涉及「禁室培育」，Brie飾演年輕媽媽，想帶5歲囝囝逃離被困房間，相當有話題性。

反而於《丹麥女孩》（TheDanishGirl）扮演變性人的妻子嘅艾莉西亞菲瑾德（AliciaVikander）在強勁對手下今屆只屬陪跑。


最佳女主角提名（戲劇組）：
姬蒂白蘭芝《卡露的情人》
朗妮瑪娜《卡露的情人》
茜爾莎羅倫《布魯克林之戀》
艾莉西亞菲瑾德《丹麥女孩》
BrieLarson《抖室》