無綫16年喺北京宣佈同愛奇藝合作，開拍《創世紀》續集《再創世紀》——嗰陣仲話會將呢套劇作為「香港回歸20周年、TVB 50周年獻禮。」（新聞連結： https://bit.ly/2Bc3v2p　）

本來呢套劇喺今年7月，緊接《天命》播映，點知臨時抽起唔播，改為播映《特技人》，雖然當時未有透露原因，不過有傳因為內容問題而出唔到批文，所以要修改再送檢。

之不過呢套劇終於有見天日嘅機會，《再創世紀》將會喺呢個月嘅29號喺CCTV-8黃金檔播，愛奇藝就會喺第二日接播出，至於無綫又會幾時播呢？咁當然係跟番之前合拍劇嘅玩法，「頭輪用膳」完畢，之後先到尾圍用膳，所以無綫再會喺9月10日先播。

查實央視呢個黄金檔，喺2007年播完《歲月風雲》之後，相隔11年再播港劇，對住大陸呢個咁強勁嘅市場，又點可以草草了事？於是林文龍、郭晉安同周麗淇等等一班演員，今日已經去咗北京，先喺CCTV-8官方微博做宣傳，聽日會喺北京出席大型發佈會宣佈詳情。

聽講因為呢套劇係用香港「回歸祖國」為切入點，講述中港兩地嘅年青人嘅拼搏，而且涉及嘅金融市場，比o依家嘅環境好唔同，所以希望「俾一個正面訊息」啲觀眾。事實上監製關樹明曾經接受傳媒訪問都講過，因為呢套係審批劇，意思即係會喺大陸電視台同視頻網站播出，同只係喺視頻網站上架嘅審批標準唔同，審批劇嘅標準會嚴格好多。依家揭盅，係喺央視播喎，大家試諗番當年無綫同央視合作拍《歲月風雲》，幾咁政治正確！

回帶講番少少先啦，《創世紀》係1999年首播，合共兩輯，由葉榮添（羅嘉良）千辛萬苦出咗部「電子寵物機」創業講起到建立「無煙城」，成個劇「底庄」除咗家族恩仇之外仲包括港人如何自力更生掙扎求存，包括許文彪講香港樓價嗰段——「點解佢哋要用成世人嘅時間去供一層樓呀？因為啲有錢佬喺度玩嘢呀！越有錢就越有得玩呀！呢個世界公平咩？呢個世界公平咩？！」

但依家，《創世紀》變成中港合拍劇、改個名叫《再創世紀》，內容由道地香港人故事，變成新一代嘅大陸、香港人拼搏奮鬥史——故事大綱係咁寫：「新世紀的開創，不僅需要夢想、遠見，更需要逆流而上，將不可能變成為可以的香港精神！」香港精神係乜嘢？唔係就係「冇精神」咩？

入番正題。《再創世紀》係講，2008年金融海嘯席捲全球，野心商人賀天生（郭晉安）想趁機吞併香港首富方松蔭（胡楓）嘅集團，最後遭富商卓啟堂（潘志文）阻撓。郭晉安懷恨在心，伺機復仇。十年後，潘志文已經成為首富，因受唔住喪子之痛，心臟病發昏迷。幼女卓定垚（垚，讀音堯，周麗淇飾）入世未深，為守家業，在私募基金代理人高哲（林文龍）扶助下，與郭晉安展開連場商戰……um……

之後潘志文醒番，郭晉安老婆明晞（楊怡）、胡楓個孫方澤雨（袁偉豪）、創業青年程凱（周柏豪）紛紛加入戰局。Then，「眾人的恩仇命運糾纏在一起，勢必掀起另一場世紀之戰……」

有網民就話，o依家已經播出呢啲咁強陣容嘅劇，唔知台慶劇又會播乜嘢呢？

精選娛聞，喺晒《娛果》
http://fb.com/appledailyent