陳潔麗噚晚喺旺角麥花臣場館舉行演唱會，阮兆祥擔任表演嘉賓，去捧場睇騷有李蕙敏、賈思樂。開場時，陳潔麗喺山頂位一路同觀眾握手，一路行上台，唱出《小時候》、《分分鐘需要你》等歌。佢同祥仔合唱《誰令你心痴》、《明天你是否依然愛我》，之後祥仔再獨唱《K歌之王》，現場觀眾打開手機燈，氣氛熱鬧。

全晚只係翻唱別人的歌，例如有鄭欣宜嘅《女神》、方皓玟嘅《你是你本身的傳奇》等，陳潔麗同負責唱和音嘅白嘉倩合唱咗首由梁詠琪原唱嘅《花火》，跟住佢介紹Band成員，每介紹完一位隊員，嗰位隊員就會退場，最後淨低佢自己一個時，就開始清唱張學友嘅《月半灣》、林憶蓮嘅《至少還有你》、陳潔靈嘅《千個太陽》，最後唱埋林子祥嘅《敢愛敢做》，全場開燈，但歌迷唔追走，太叫encore，最後唱到11:45至完騷。

陳潔麗於騷後接受訪問，笑話唱到好夠喉，破紀錄唱咗3個鐘。由於一連兩場都唱到超時而被罰款，陳潔麗坦言：「我唔知點算呀！都係主辦話事，唔知要唔要自己填數，不過真係有需要都覺得係值得嘅。」講到全晚只係唱別人的歌，佢話：「我有自己歌嘅，繼續收緊歌，遲啲會再出翻唱碟，自己嘅歌未必用專輯形式出。我要有好多謝祥仔做我第一個嘉賓，以後佢有咩用得着我嘅地方，一定會盡力去做。」

精選娛聞，喺晒《娛果》
http://fb.com/appledailyent