李八方online︱獲委任環境運動委員會主席 黃傑龍：我本身就係一件廚餘
蘋果日報 2020/12/24 22:41
黃傑龍李八方online環境運動委員會
叙福樓集團主席兼行政總裁黃傑龍（Simon）獲政府委任為環境運動委員會主席，接替將赴新加坡任教嘅中文大學前校長沈祖堯。資料圖片
叙福樓集團主席兼行政總裁黃傑龍（Simon）百足咁多爪，今日又撈多一瓣，獲政府委任為環境運動委員會主席，接替將赴新加坡任教嘅中文大學前校長沈祖堯。環保係世界趨勢，各行各業都不能獨善其身，做開飲食業嘅Simon好謙咁話，自己戰戰兢兢頂上，只係想以身作則，仲直認不諱：「我本身就係一件廚餘啦。」
Simon笑說，廚餘本身都有生命，「只要你珍惜佢都係有用嘅」，今次佢就親身演繹。從事飲食業13年，Simon旗下酒樓早年已推出無翅婚宴，又轉用LED燈和節能爐具，仲攞過香港環境卓越大獎金獎，政府搵佢推動環保運動都唔出奇。況且疫情期間，食肆俾限聚令玩謝，冇得做堂食時，只能靠外賣「吊鹽水」，衍生好多塑膠飯盒和餐具。
關注海洋塑膠問題 旗下食肆去年起停派飲管
Simon同八方講，佢好鍾意出海，一直都關注海洋塑膠問題，為鼓勵「走塑」，佢旗下食肆去年起唔再主動派飲管，部份飲品走飲管仲可以減收10蚊，埋單計數，一年就節省咗50萬支飲管。
Simon明年1月1日先上任環境運動委員會主席，任期兩年，但政府公佈後，佢就即刻收到order要研究立法處理廚餘，仲要膽大包天搶先政府喺自己嘅Facebook公佈。原來係一名科技大學研究生寫緊有關香港廚餘立法控制嘅paper，想訪問佢畀吓意見啫。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！