【韓流】打入Billboard藝人榜前十 BTS搬豪華新宿舍
防彈少年團BTS
韓國人氣男團防彈少年團(BTS),唔止喺韓國有高人氣,喺海外亦相當受歡迎。而美國Billboard網站於當地時間前日發佈年終排行榜,BTS更打入多個榜單,力證人氣。
據美國Billboard網站顯示,喺基於廣播播放次數、下載量、網上播放量為基準評選嘅「Top Artist榜」上,BTS排喺第10位,而喺「Top Artist Duo/Group榜」中,BTS亦取得第二名嘅好成績,而BTS更於「Social 50 Artists榜」上排名第一,認真厲害。
而BTS今年9月推出嘅專輯《LOVE YOURSELF 承 'Her'》,喺韓國最大音樂網站Hanteo Chart上突破100萬張銷量,成為Hanteo Chart史上單一專輯嘅最大銷量,再次破紀錄,展示不同凡響嘅市場號召力。
BTS有咁好成績,公司當然都唔會虧待佢哋,今日就有韓媒報道,指BTS於月初搬入高級嘅新宿舍。報道指BTS新宿舍位於號稱韓國最貴公寓區嘅Hannam THE HILL,而BTS所屬事務所亦表示:「將BTS宿舍安排喺呢度,係為咗讓成員有更舒適嘅居住環境,BTS對新宿舍都好滿意。」
據韓國國土交通部最新發佈嘅數據,Hannam THE HILL壟斷晒今年1月至11月期間全韓國公寓成交價格榜嘅前十位,一間244.78平方米嘅屋,交易價就高達82億韓圜(約5,866萬港元)。住喺Hannam THE HILL嘅多數都係金融界、政界嘅大人物,而韓劇《W》女星韓孝珠、目前懷孕嘅秋瓷炫都係住喺呢度。
更多韓流,喺晒《娛果》
http://fb.com/appledailyent