但香港政府新聞處就連新華社稿都唔識睇，發出新聞公佈——「香港科研人員獲頒授二○○五年度『國家科學技術獎』獎項」，一開始就話香港獲得一個一等獎和四個二等獎項，用咗兩段嚟講呢個一等獎，就係香港大學范上達教授與其研究人員嘅項目「成人右葉活體肝移植」。范上達教授大名鼎鼎，佢哋獲獎值得全香港拍爛手掌，但係——佢哋攞嘅係「國家科學技術進步獎」一等獎，算係乙組冠軍啫喎，攞冠軍組獎項嘅研究人員咪重威威？
香港好多報紙受新聞處誤導，記者編輯不求甚解。大篇幅報道范上達等，配以大幅圖片，左丁山睇到，以為范上達係車路士㖭。到咗當日（一月十日）下午，碰到一位大學教授，佢猛咁搖頭，指報紙對攞得國家自然科學獎二等獎嘅教授不公平，譬如港大任詠華教授攞呢個二等獎，其實重要性更高。超級組（國家最高科學技術獎）冠軍○四年度冇發出，寧缺毋濫，今年有兩位得獎。能夠攞到冠軍組二等獎，已經唔容易，今次香港港大（一個）、中大（一個）、城大（一個）、理大（一個）共取得四個國家自然科學獎二等獎，論重要性，更值得傳媒深入報道。