羅富全喺開鑼日（3日）憑住「銘記心中」取得從練以嚟首場頭馬，新馬房有個好開始。無可否認，「銘記心中」贏馬，唔多唔少都同上手練馬師吳定強保養得宜，隻馬評分有大把水位有關。馬迷喺季初階段，不妨留意多啲吳定強轉出嚟嘅馬，隨時會發掘到唔少寶藏。

過去吳定強一直被馬迷認為以慢火煎魚手法練馬，去得佢馬房嘅馬好多有傷患底，加上強哥本身錫馬，嚴格嚟講佢係養馬多過操馬。

近季散倉嘅馬房，有好多旗下馬未發揮應有實力，好似上季由胡森同孫達志練開嘅馬，好多隻轉倉後都脫胎換骨，預計唔少前吳廐馬今季都會反彈。

舊馬落入新練馬師手上，好處係新練馬師肯動腦筋同認真做操練功夫。好似「銘記心中」，羅富全就明顯擺咗心思落去，知道隻馬衝力短，特登安排縮程跑1200米，亦明刀明槍強配莫雷拉，結果順利幫隻馬開齋，馬房亦旗開得勝。

今晚（6日）列陣尾場嘅「鄉村輝煌」，可能係羅富全另一隻開發嘅吳定強寶藏。「鄉村輝煌」上季中轉投吳定強馬房前，一直由蔡約翰訓練，當時身為蔡廐副練嘅全哥，對呢隻馬相當熟悉。

隻馬上季中以後密密減分，由97分跌到落現時89分，上季尾最後一場跑第四已經有好走勢。今場轉倉操足加熟手柏寶，有望為全哥再添頭馬。

另一位新練馬師麥菲文，嚟緊星期日首次派馬出賽，咁啱其中一隻正選馬「銀豐神駒」，又係由吳定強馬房轉出嚟。

「銀豐神駒」上季煞科日搏失，未能成為吳定強收山馬，即管睇吓有冇機會補中為麥菲文開齋。若然今季兩個新倉都係由前吳廐馬打開勝門，絕對係一時佳話。

阿Joe