玉石一直給人out-dated的感覺，但原來玉可以與「阿婆」、「老土」脫鈎，潮得很。在半年前創立本地玉石工藝品牌「小玉舍」的談浩然，承傳玉器師傅爸爸談洲生的手藝，把玉器改頭換面，他以「銅撞玉」的設計一洗玉器土氣形象，希望吸引年輕一輩愛上玉器。

今年25歲、曾在理工大學修讀產品設計的談浩然，成績很好，更考獲兩筆獎學金，去年畢業後，本來可以安安穩穩打份工，但他曾接過freelance設計工作，眼見設計行業的大量生產風氣，對於成為其中營營役役的一員感到卻步。「香港人當設計師係一件工具，設計師應該有工藝，工藝係設計嘅源頭。自己近水樓台，爸爸係工藝師，我學咗佢一啲工夫，再加自己嘅設計，就變成小玉舍。」

「飾物本來就要時興，但玉好傳統，後生唔鍾意。小玉舍係一個平台，畀多啲年輕人認識玉器。」於是他推着自己做的工具車及飾櫃，走到市集、地攤擺檔，目的是跟人傾偈，越多人越好，而且每次有人上工作室參觀，他都會細心講解不同玉石的種類。「『雙玉』系列展現師傅嘅分色工藝，所謂雙玉根本係一粒玉，令大家了解一塊玉可以有兩種顏色。」

玉講求圓滑，但談浩然設計的飾物偏偏起角兼直筆甩，他的爸爸又點睇？「我唔鍾意，但佢有啲設計我又覺得幾好，例如『觸玉』系列令人戴玉器時皮膚可以掂到玉，玉越戴越油潤亮澤。粒玉360度可以轉，我做咗咁多年都冇見過。」威嚴夾雜父愛，在玉石業打滾41年的談洲生對玉藝有堅持，與兒子有時會為如何雕琢各執一詞，但同時欣賞阿仔的諗頭。新人要入傳統行業，當然不能把舊價值抹掉，談浩然對爸爸相當敬重，「我哋可以相輔相成。我好高興自己為佢嘅事業增加色彩，將設計嘅新觀點帶畀佢。」

記者：葉青霞