一線騎師好似莫雷拉丶潘頓咁，有時一場有兩三隻馬可揀騎，當事人能左計右度，揀出自己最睇好嘅一匹，然後落實策騎，真係令一些二三線騎師羨慕。

今日（17日）第四場四班1200米泥地賽，徐雨石馬房「豹子頭」上仗同程喺何澤堯胯下一出即勝，但今場再出，何澤堯卻騎師傅方嘉柏隻「極速銀桂」，此駒上仗泥地1200米得季軍只輸0.75馬位，近績亦佳，驟眼看似係何澤堯揀騎；而「豹子頭」就換上見習生巫顯東。

不過，何澤堯坦言自己根本唔存在「選擇困難症」，因為「豹子頭」上場贏馬後加5分至57分，徐雨石已同佢講隻馬再出會改由見習騎師上陣，以抵銷磅位增加，一早知道今場冇得再騎，所以自己並非揀馬騎。

至於「極速銀桂」今季兩次出戰泥地1200米分獲1季1殿，表現大有起色，呢匹馬服役角逐過9場賽事，全部由何澤堯經手，他對馬性好熟悉，話唔定係時候取得突破贏馬。