周汶錡(Kathy)、鄭欣宜同彭秀慧今日喺尖沙嘴，出席香港癌症基金會主辦嘅《粉紅革命啟動禮》， 活動上仲有乳癌康復者分享抗癌嘅心路歷程。周汶錡就話自己o依家每半年就會做檢查一次：「自己做咗媽咪之後，個人都特別緊張，以前唔舒服唔夠瞓都唔會點理，但o依家就唔同晒，盡量都以小朋友為先。」

Kathy話做咗媽咪後更覺得以前一輩嘅媽咪更加偉大，佢笑言：「o依家啲小朋友比較我哋以前醒目好多，大仔有時會激嬲我，見到我想鬧佢嘅時，就扮冇嘢走咗去，隔一分鐘之後見我面色好番又識得走嚟o氹番我，識得講媽咪I am Sorry，唔知佢喺邊度學番嚟。」

另外，欣宜台上亦分享有一次疑患乳癌驚魂，佢話試過有一次喺屋企檢查自己乳房嘅時候發現硬塊，欣宜憶述：「當時我好驚，但知道接落嚟嗰幾日都冇時間睇醫生，於是每日都提心吊膽，直到醫生話係因為嚟月經嘅問題先有呢個情況，叫我唔使擔心。」佢話經過今次自己更加留意檢查乳房，講番懷疑自己有乳癌嗰幾日，欣宜話：「真係好驚，每日都有同班姊妹傾，但其實佢哋都幫唔到我啲咩。」咁有冇同爸爸鄭少秋講？佢話：「梗係冇啦，實嚇死佢呀，我自己都咁驚，好彩o依家冇事。」