新正頭間間公司搞團拜,噚日輪到中原集團主席黎明楷(Sherman)率領一眾高層,精神奕奕同大家拜個年。一眾地產商好似恒地(012)、新世界(017)、新地(016)及信和(083)等,都有代表撐場。Sherman派完利是,華華循例問吓佢點睇今年樓市同集團發展,佢話受阿爺調控樓市影響,中原喺大陸都唔易做,被逼削減近兩成規模。大陸原本有3.6萬個夥記,舊年年尾就郁咗成5000人,得番大約3萬人,北京、深圳及上海係重災區。
咁香港情況呢?Sherman話好過大陸,因為仲有錢賺,所以冇點「cut」分行及裁員,只係自然流失1成人手。不過佢話如果個個月都係得3、4千宗二手成交,點養咁多人,暗示會再收縮規模。佢亦唔太睇好今年樓市,樓價跌開通常會順住跌,上半年料跌一成,下半年就升,全年可能打和,但全年成交可能得番6萬宗。