雖然近排市況唔算好活躍,但新股就不停係咁上,好多新股小初連名都未記得住,但已經又話搞掂上得市,雖然有個別新股要調低集資額先至圍齊飛,但接二連三跟住上,似乎芬佬真係多錢得好交關。
經紀黃話,今日有一隻喺寧波做汽車零件嘅敏實集團招股,據講招股價PE約8至10倍。但上市有一段日子嘅同類股北泰創業(2339)似乎重平啲,隻股現價往績PE8.28倍,而有證券行預計06年PE唔夠6倍。
北泰上周公布中期業績,雖然純利升37.9%至1.73億元,但派息率竟然比去年為低,消息一度令北泰股價下挫。公司解釋原因,係因為去年底發行過一批可換股債券,條款中對公司派息有限制。
今年鋼材價格上升,但北泰毛利率竟然可以上升,相信係公司將重點放在高毛利率產品之故。北泰喺數月前,曾因芬佬減持導致股價下跌,但呢批貨相信都消化得七七八八,股價上周五升3.37%,收2.30元。
慕容小初