立法會工務小組今日將會討論669億天價高鐵撥款申請，各路反高鐵人馬噚日率先踩場，連環踩上民主黨、民建聯同工聯會總部，游說立法會議員棄暗投明，投反對票唔好畀大白象上馬。一班80後出生嘅年輕人就特別擔心高鐵未促進中港融合，卻先促進民主黨民建聯融合，噚日特別向白鴿黨送上五隻燒乳鴿，提醒佢哋唔好變身民建聯。
反高鐵人士趁民主黨噚日下午開會討論投票意向，特別買咗五隻紅燒乳鴿，代表白鴿黨喺工務小組嘅五票，拉埋幅寫上「民主黨棄權＝贊成＝出賣＝民建聯」嘅banner，喺立法會門外向該黨嘅交通政策發言人鄭家富請願，促請佢哋為民請命，千祈唔好投棄權票咁縮骨。

開完會決定投反對票

阿富搞爛gag叫班後生仔下次環保啲，話民主黨就算同高官食飯，都例牌唔食乳鴿，呢個係白鴿黨嘅堅持喎。但呢五隻乳鴿都算死得有價值，因為白鴿黨開完會之後，決定向高鐵說不，投反對票。
與此同時，20幾個受高鐵工程影響嘅菜園村、大角嘴同華景山莊居民鍥而不捨，朝早一齊展開游說之旅，首站係民主黨。不過，當時冇議員在場，由總幹事陳家偉代表接見兼接信。班居民之後隨即踩上民建聯總部，但職員話所有議員都唔喺度，請願人士用民建聯總部個電話打畀議員，民建聯索性截斷所有電話線。一班居民好不滿，話呢個就係民建聯，又高呼「民賤聯」，仲將反高鐵嘅標語貼喺民記個招牌度，叫班議員唔好出賣居民。最後一站係工聯會，但居民眼見對方派出成8個職員同保安阻擋，又唔肯幫佢哋約議員王國興，只好就地靜坐20分鐘抗議。
mailto:[email protected]