面對未來數場選舉，民間呼籲各行各業成立工會「攞票」，被視為傾向保守、立法會議席一直由建制派把持的工程界也有年輕人成立工會。「呢個界別極保守之餘仲要係政治冷感！」香港創建及工程人員總會（HKCEU）主席魏梓維如此形容工程界，他表明成立工會不止以爭取一張選票為目的，亦為罷工儲彈藥，更重要是改變從業員政治冷感的「本性」，故籌備工作配對平台、成立應急基金，籌劃建造業黃色經濟圈，希望工會聚人氣也聚財氣，成為打工仔最強大後盾。

記者 梁穎妍

成立工會最低人數要求只需7人，但HKCEU由去年11月成立以來累積逾700名會員，並持續招收會員，工會主席魏梓維及副主席董仲賢接受《蘋果》訪問時強調，成立工會「冇刻意望住選舉」，當初眼見業界從業員擔心被老闆秋後算賬導致三罷局限大，萌生組工會的念頭，因應反修例運動而在Telegram成立建造業界群組推動籌備工會，並決定不細分工種，籌組跨界別總會，以壯大基礎，「希望工會可以喺呢行至少立咗足，有個據點召集多啲同路人，畀個地方知道大家想點，團結咗個力量先，之後有任何後續活動可以容易搵到啲人出聲，無論之後罷工或者叫人做選民、特首選委（參與選舉）都一樣」。

全民政治覺醒，但回歸現實，難免有人無奈噤聲，二十出頭仍在進修以取得工程師牌照的魏梓維表示，現時行內沒有傳出白色恐怖實例，但行家都擔心走得太前被「記名」，因為負責考核牌照的資深工程師普遍「偏親中」，政府又是行內最大僱主，批出工務合約，「所以成個行業就係好驚囉，一係考唔到牌一係冇工開，任何事都唔夠膽講」，因此他認為全民覺醒下要扭轉局勢，要從結構性問題着手，為日後有需要發動的工業甚至政治行動，如罷工等儲彈藥。

設基金助罷工被算賬的打工仔

「現存勞工法例（對罷工）保障都唔多，香港話就話有自由，但係保障唔多，唯一可以保障係人數同埋錢」，工會目前年費為800元，魏梓維承認「比較貴」，但強調約四成用作成立應急基金，希望能為因罷工等遭秋後算賬的打工仔提供支援，認為基金是予行內人士加入工會的信心，同時亦希望透過舉辦講座，讓業界交流工程及勞工知識，促進不同資歷從業員的知識傳授。

董亦透露，工會擬推出建造業黃色經濟圈，「為僱主僱員前線員工做返個平台，畀佢哋搵同路人配對」，目標透過確切保障吸引業界人士加入工會，「亦希望吸引到更加多業界人覺得工會唔係政治掛帥，乜都唔做」。

冀港人政治熱情「唔好咁快冷卻」

工程界長年由建制派把持立法會議席，雖然業界保守傾向令民主派翻盤不樂觀，特別是年輕從業員或因未取得牌照而不合資格投票，但工會目前仍積極呼籲選民登記，魏梓維表示，「覺醒呢就覺醒晒，只係大家會唔會再進一步㗎啫」，期望業界可以加入工會及參與工會工作。重要事情說三次，魏再三強調辦工會是「long run project」，直言「香港人好多事行動力快，遺忘都好快」，希望香港人的政治熱情「唔好咁快冷卻」。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架