《蘋果》老總張劍虹最近接受樹仁大學《仁聞報》訪問，分享做新聞嘅心得，不過八方未睇內文，先畀「沙膽虹」張成大半版嘅相吸引，佢用手托住個下巴，擺出個Chok樣嚟影相，直頭係想電死人咁款！
樹仁學生喺個訪問入面問佢點睇《爽報》係咁俾人投訴不雅，佢不改「沙膽」本色，話對社會有咁嘅反應，佢好驚訝，其實呢個世界乜人都有，市場咁大，新聞最緊要係大眾化，如果存心想登色情古仔，就唔使搵陶傑執筆，搵「骨精強」已經得。佢又話，做新聞嘅要訣其實只係兩句話：「事事做到盡，在界線前止步」，完全概括佢「沙膽虹」嘅精神。