入行8年嘅鄭欣宜，終於等到機會開騷，將於下月假Star Hall舉行2場「女神有問題演唱會」，日前佢喺中環接受專訪，解釋個唱名有意思：「一個係我有問題想問，另一個係我有問題存在，恐懼係其中之一，我好驚停留一個位置，唔再成長唔再進步！」

吳業坤被網友笑出2隻碟就踩上紅館，其實欣宜都只係出咗4張唱片，佢覺得自己又夠唔夠歌呢？欣宜話：「其實冇歌都可以做演唱會，睇你想做啲乜同擺幾多心機，原來我plugged過嘅歌都有20幾首，但hit嘅得3首！Wow，ok嘅，我都會唱吓其他人嘅歌。」

新歌《女神》爆紅造就欣宜開騷，佢感慨話：「因為呢首歌，大家覺得我係好堅強好樂觀嘅人，其實我都會有唔開心、迷茫、困難時期，之前直踩50個鐘冇瞓，我覺得自己好叻呀，點解可以唔瞓嘅，我座佑銘係船到橋頭自然直，煮到埋嚟就要食，覺得冇嘢做先係捱，試過喺屋企成日等工作，望唔到前路，諗住放棄做呢行，好在冇放棄，否則唔會有自己舞台。」

欣宜話依家心情未識緊張，好興奮好期待：「8年呢段時間唔可以話長，但絕對唔係短，我嘅青春已經擺晒呢行，無論點我都要殺一舖，我唔係唱歌真係最好聽，亦唔係跳舞最好睇，但我絕對保證一定用盡力去做。」

化妝：Samuel@江中平化妝室
髮型：Milk Chan@Xenter
場地：Spark Bar & Restaurant