【上仗輸得唔抵】容天鵬超強後勁馬 抽靚位勢展現真身!
容天鵬幸運興隆
上周三谷戰用B欄大利外叠後追馬,今晚(12日)快活谷夜馬則轉用C跑道,形勢會否相同賽前真係靠估,但睇番上季首次C跑道賽事亦有得追,故此內叠前置馬仍然不宜過份側重。
剛戰容天鵬馬房連場出擊,可惜未竟全功,僅四駒入位,今晚此廐只派「中華壹號」及「幸運興隆」上陣,兩駒均於上季最後一仗交出全場最快末段時間,尤其「幸運興隆」劣勢下衝近,更加值得重視。
第七場三班1200米,「幸運興隆」今仗季內復出,雖然加至70分以上未再上名,不過近三仗均交出最快末段衝近,其中上仗(上季最後一戰)角逐同程谷草1200米,該場段速「慢、快、快」,頭段比當晚兩場四班仲要慢,而尾兩段均造出頗快時間,難怪由三匹守前四位馬匹包辦三重彩,「精算八方」更加藉步速之利一放到底,後追馬根本難以反先。
當晚「幸運興隆」能夠衝22秒半以內追近跑第五,其實難度極高,亦輸得唔抵。今仗移入四檔,估計未必再咁被動,毋須再留得太後,既然此馬上季四次排五檔以內跑谷草均非冠即亞,以此推算,今仗應具良機。