王賢誌（Vinci）今日以東華三院副主席身份，出席喺中環文武廟舉行嘅「文武廟170周年廟慶」，噚晚啱啱喺日本返港嘅Vinci，同老公Kevin、家人玩足8日，佢話：「喺日本冇乜過年氣氛，係今日返到嚟先感受到似過年。」佢仲話喺日本食咗好多正嘢，發福不少，嚟緊要努力減肥。

今年係Vinci同Kevin婚後第一年派利是，準備咗幾多彈藥？Vinci話：「我哋第一年派，都唔知要預訂換新銀紙，未試過派呀嘛。」係咪跟傳統新婚派雙封？佢就話：「同佢一齊派好啲，開心啲。」

提到喺日本嘅酒店發生懷疑執房後忘記閂門事件(新聞連結: http://bit.ly/2l30TqC )，Vinci就話當時間房有iPad、電腦同利是，好彩所有嘢都原封不動，冇任何損失，只係嬲酒店嘅人太疏忽。佢話：「酒店經理不停道歉，搞到我都唔好意思。有人話我行運，因為冇唔見嘢，係好事，我返嚟又upgrade咗去頭等。」

另外，主席馬陳家歡就好相信文武二帝，佢話：「小朋友考試都會嚟摸吓支筆，成績OK㗎，呢啲中國文化應該繼續盛傳落去。」而馬清揚總理新年就去咗英國探囡囡，但係太太錢慧儀就患咗感冒，未有同行，馬生仲大讚英國唐人街好有新年氣氛，玩得好開心。