盧凱彤(Ellen)，雞蛋蒸肉餅、獨立搖滾樂團Phoon，噚晚喺灣仔出席「搶耳音樂博覽」，以壓軸嘉賓出場嘅Ellen話：「原來係明哥推薦我，佢對我嘅音樂好有抱負，亦覺得我好有國際視野，其實今晚有好多嚟自世界各地嘅樂隊、音樂人，包括中、日、韓等，希望現場有人睇得起我，包我做世界巡迴演唱會。」

原來噚晚現場有好多勁人表演，佢笑話自己都有啲緊張，想拎出自己嘅殺手鐧喺現場表演，更想衝出香港：「之前做過台灣巡迴，希望可以去日、韓、歐洲地方，我嘅fanpage有歐洲人Like，但得幾個人，呢啲地方可以探索吓。」問到會唔會去歐洲做Busking?Ellen話：「可以試下，內地有隊樂隊可以去到歐洲巡迴，我都好想，佢哋做Depeche Mode暖場嘉賓，我都好想有機會，我會向呢個目標進發。」

Ellen希望今年底可以推出一張EP，佢話：「今次主要做廣東歌，o依家語言無界限，所以乜語言都可以去唔同地方唱，希望到時有誇年騷，可以賺多啲錢。」問Ellen係咪好等錢使?佢笑話：「唔係，我係食仙氣嘅，係氣質歌手。」

精選娛聞，喺晒《娛果》
http://fb.com/appledailyent