港股第2日調整，恒指落返24000大關樓下，收23984，跌327點，期指收23997，輕微高水。今個升浪，最高上到24642，暫時回咗700多點，估計仲會回多一兩日，只要守得穩在50日線（23400）之上，整固完成後，若能升破徘徊區頂部25200阻力，可向28000水平推進。

噚日下晝跌勢轉急，主要係受內地A股大插5.5%之勢拖累，其實，無論外圍市勢係點，港股在急升4000多點後，回一回氣係好正常之事，恒指在250日線（24194）上下穿梭，亦係上車的大好機會，特別係未升過嘅三四線股仔，下一個浪，將會輪到佢哋發威。就以噚日嘅中國科技（985）為例，貨源歸邊後，一衝就飆上14.8仙，大升2.3仙，升幅18.4%，而且交投仲㷫烚烚，有成8.8億股，睇勢只係啱啱起步，有排上。
上升正股有230多隻，中電新能源（735）最高0.73元，收0.71元，升1仙，此股早一輪仲企在1.0元水平，但上個月就大跌，落到0.6元先定得住，公司情況好正常，股價波動相信係同股權變動有關，現時反彈應該好快可以去返0.9元至1.0元呢啲位，博彈3成。
集團專攻再生能源，現時手頭上有6個發電項目，裝置機組合計1000兆瓦，其中有3個項目係去年10月向中國電力（2380）購入，作價16.3億元，以發行12.8億股每股作價1.27元支付。過去一年，集團為拓展業務而集資兩次，包括去年5月每股作價0.905元配股集資5.6億元，以及去年8月以每股0.81元配售予中海油總公司及張松橋，集資約10億元。母公司和新股東都以1.27元和0.81元「上車」，反映現水平股價着實偏低。

國家已規定由2010年開始，電廠10%的供電為產自環保能源，按目前中國每小時耗電量6億度計，2010年開始每小時所需要的環保電量為6000萬度，故中電新能源有極大發展前景，公司亦已計劃今年內會進行多項收購，主力係水力發電廠，而母公司亦會注入風力及垃圾發電廠，總投資將逾100億元人民幣。中電新能源已獲得國家開發銀行100億元融資，進行龐大擴展計劃。