由大學講師做到上電視嘅歐陽偉豪（Ben Sir），噚晚喺九展開一連兩場Talk Show《Ben Sir開Show》，繼續踩界講諧音粗口同鹹濕嘢。

林穎彤(Bella)向Ben Sir請教吹簫，場面有些少鹽花。而麥美恩、林穎彤、陸浩明(6號)、蘋蘋就同觀眾玩互動，教男觀眾「瀨撻」，然後再教女觀眾「lam撻」。6號仲好好艷福，俾麥美恩揸完胸，又被蘋蘋胸壓。

之後又到番Ben Sir出場，講返自己本書《粗口講堂》，早前被淫審署話冇學術價值，佢就舉例書局買到兩本教「FxxK」同「BxxCH」嘅書竟然冇包膠，引申到其實要捍衛廣東話。

Ben Sir唱《獅子山下》後，估唔到Talk Show都有encore位。Ben Sir喺台上發表愛的宣言，向老婆講「我愛你」，佢話今日係佢同太太結婚22周年。完騷後，Ben sir受訪時仲好恩愛不停打俾老婆問佢係邊，問到結婚周年都唔慶祝使唔使跪玻璃？佢話﹕「都冇力啦。(使唔使『蒸翼』(鹹濕諧音)？)呢啲嘢唔食得住，要保持清淡，我都有為個騷keep fit，雖然冇六嚿腹肌。」

Ben Sir全晚都係講粗口諧音，好少講粗口，唯一同6號合唱改編自金曲《難為正邪定分界》嘅粗口歌，唱出打工仔心聲，Ben Sir解釋﹕「啲人欣賞我點踩界，點用技巧去表達，講咗唔驚喜。《難》都係唱韻母出嚟，如果唱埋粗口就無咁過癮，最難係引觀眾爆粗，好彩都成功令大家爆發情緒。」

Ben Sir讚自己噚晚表現係超水準，俾自己101分，問到係咪會去澳門做騷？佢話﹕「都可以諗，想做巡迴。(會唔會繼續開《Ben Sir學堂》系列？)有諗，唔抗拒，我成日都話見好使到盡，但都要過埋呢兩日先。」