由姜棟元、韓孝珠、尹啟相等主演嘅韓片《暗殺速遞》下周四喺香港上映，電影係改編自日本著名推理小說《金色夢鄉》，小說亦曾拍成日本電影，並由堺雅人及竹內結子等主演。

姜棟元喺片中飾演男主角建宇本身係一名誠實又勤力嘅速遞員，仲曾經得過好市民獎，不過佢有一日突然被冤枉，指佢暗殺咗總統候選人，搞到佢要展開逃命之旅，幸而昔日好友都相信佢係清白，仲齊齊協助佢度過難關及洗脫罪名。

姜棟元之前飛咗去台灣做宣傳，香港方面佢就抽唔到時間來港谷戲，不過就有接受《蘋果》嘅訪問，姜棟元喺片中要不斷咁奔跑，可以話係佢從影以來跑得最多嘅一齣戲，姜棟元直言電影角色本身同佢性格信念都有許多相似嘅地方，所以準備角色時都比較輕鬆。由於角色係一個平凡人物，製作人員希望佢可以增重配合角色，所以姜棟元都好大犧牲，放棄型仔Look，日日好努力增肥，食多幾餐兼停做運動成兩三個月，最後成功增重11磅。姜棟元話：「之前拍《MASTER》時都有增肥，嗰時大約喺158磅至163磅，大家叫我再肥一啲，所以先繼續增肥。增肥時可以好開心咁食住拉麵、朱古力等食物，增肥時嘅心情好好。」

對於角色十分善良兼容易相信別人，姜棟元亦直認自己曾經亦都唔識拒絕人，但咁樣會令佢喺工作上更加辛苦，所以最近亦學識拒絕。。佢話：「《暗殺速遞》係好貼近現實嘅電影，雖然電影所包含嘅訊息有點沉重，但非常寫實易理解，亦可以毫無壓力咁好好欣賞呢部作品。希望電影能帶來正面嘅力量同訊息。」片中佢被身邊人包括女友出賣，問到佢現實中試過出賣別人？姜棟元自言佢嘅座右銘係唔好傷害其他人，佢話：「無論點睇，喺呢個世界上要善良地生活着似乎唔太容易，尤其喺現今呢個精明地生活着嘅亦會遭受許多指摘嘅社會，但係善良，也許咁樣會有點吃虧但亦唔算壞，呢部份亦會成為一種力量。」

問到如果片中主角嘅經歷成為自己嘅親身經歷時，姜棟元話如果真係發生喺佢身上嘅話，佢唔會好似主角咁鬆懈，反而佢會徹底地計劃去解決問題，而唔會好似展開逃亡。至於還想挑戰甚麼類型角色時，姜棟元話：「現在正拍攝嘅作品係有愛情成份，但我唔會特別因為想拍愛情片而刻意去選擇。當時如果有好嘅劇本就會想去挑戰哪個角色。但好像有許多女觀眾想睇到我喺愛情片演出吧？經常會收到有關嘅提問。但如果有人問演員下一部想挑戰什麼而回答說想拍愛情片，往往係事與願違。」

更多韓流，喺晒《娛果》
http://fb.com/appledailyent