胡杏兒、胡定欣及梁烈唯等，噚晚到尖沙嘴出席活動，提到唯唯被黃浩告誹謗，踏入2013會否想遠離是非？唯唯話：「梗係好，希望社會和諧，身體健康，搵得到賺得到身體好。」有傳唯唯已聘請律師，佢話係，但就表示不便再作回應。

之前唯唯喺商台宣傳劇集嗰陣，大發「蝗蟲論」，話有隻蝗蟲科動物想飛入屋撲火，結果撞咗落玻璃上，暈咗，仲俾蝙蝠飛食咗。噚日問唯唯仲冇被蝗蟲騷擾？佢笑稱：「我冇時間抹窗。」此外有傳言指有富豪支持黃浩告藝人，唯唯亦表示不回應。至於杏兒被問到會否想有拖拍，佢就話一切隨緣啦。