周星馳執導《美人魚》喺2016年農曆新年上映，票房大收，曾係「中國影史票房冠軍」，近日「美人魚」林允喺微博貼咗執行裝嘅相，指自己要入組拍戲，隨後周星馳助理陳震宇轉發兼留言：「珊珊你好!」間接證實林允將繼續演「美人魚珊珊」，唔少大陸網民都估男主角係邊個，會唔會又係演「劉軒」嘅鄧超。

噚晚網民「Leessang石頭」喺微博貼出兩張《美人魚2》劇組喺深圳開工嘅相，其中一張相見星爺戴黑色cap帽同口罩低調現身片場，另一張相就見現場放咗一塊文字板，上面寫住男、女對唱，歌詞就係《射鵰英雄傳之華山論劍》主題曲《世間始終你好》，之前鄧超喺片中同珊珊對唱過呢首歌，星爺真係對呢首歌情有獨鍾。此外，呢張見林允戴住藍色假髮企咗喺側邊，身邊有一個高大嘅男演員艾倫，估計鄧超被out。