英國桌球手奧蘇利雲（Ronnie O'Sullivan）禮拜五喺英國錦標賽半準決賽以局數6:3擊敗同胞球手高特（Martin Gould）晉級4強，就咁睇比數奧蘇好似贏得好輕鬆，不過其實過程都未至於完全嘅一面倒。綽號「火箭」嘅奧蘇利雲更加係出盡法寶至贏到波！

事實奧蘇利雲今場係弗嘅，一開波就連打兩cue century，之後再掃埋第三、四局，當中包括喺檯面無明顯機會嘅情況下cut入一隻中袋靚紅波，小休嘅時候已經領先4:0。比賽繼續之後，高特喺第五局領先47:1嘅時候打失，「火箭」埋檯見無靚chance，一心set波等機會。點知呢cue波打錯晒，仲大力到不得了，點知啱啱遇著剛剛，個白波撞底cusion彈番去檯中間之後，竟然貼實隻藍波變成靚set，不過就九成九係「符碌set」。高特拆唔到呢球，奧蘇利雲就把握機會「起break」55度，再贏埋第五局。

落後0:5嘅高特完全無放棄，佢之後打出一cue 101度，同兩cue「50+」，連贏三局追到只係落後3:5。但係奧蘇利雲喺第九局又嚟料，今次就貨真價實嘞，打出一cue 94度high break，最後贏6:3晉級，準決賽會鬥蘇格蘭嘅麥奎亞（Stephen Maguire）。

同日其餘賽果，英國嘅梅菲（Shaun Murphy）以6:1擊敗馬克京治（Mark King），4強會鬥威爾斯嘅戴爾（Ryan Day）。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM