噚晚《新城勁爆頒獎禮2017》曲終人散，一如之前傳聞所講，英皇同新城破冰，李克勤奪得3.5個獎成大贏家，包括勁爆年度歌手、勁爆播放指數、勁爆合唱歌曲同勁爆演繹大獎《失魂記》。陳柏宇同側田各奪三獎，衛蘭同王菀之亦分奪三獎，平分春色。

噚晚坤哥吳業坤成績都唔錯，同JW王灝兒合唱嘅《原來只因深愛著》拎咗勁爆合唱歌曲，至於吳業坤同Cousin Fung嘅《傷心到變形》就拎咗勁爆作曲獎，另外仲同洪卓立、鍾舒漫、小肥、黎曉陽拎埋勁爆躍進歌手。對坤哥嚟講，拎作曲獎意義重大，證明佢過去一年寫歌係有成績有回報。

噚晚慶功宴上，坤哥竟然冇食嘢。冇食嘢咁慘？係咪因為緋聞女友、女子組合Super Girls成員Aka畫展「HER」嘅作品被指涉抄襲有關呢？佢話：「我都唔知，唔太清楚，但我相信佢唔係嘅，因為我嗰日都有去佢個畫展，有睇過佢啲畫，好似好精細，藝術成份好高，感覺到佢有情感喺入面。」但精細同情感都可以抄襲0架喎！坤哥再話:「總之我感受到，我覺得佢唔係囉。但係報道詳情我都唔清楚。」

之後坤哥即改變話題，表示：「其實我今日好唔舒服，因為噚日食錯嘢，今日起身好唔舒服，所以有啲綵排都冇去到。」

坤哥又話：「頭先上台都好驚，因為台下人見到我面色唔好，會以係我唔開心。其實我唔係。」

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent