鄧兆尊近年周旋喺Carmen、車厘子及Claire三個女友之間，被祥嫂指佢係想復出娛樂圈（新聞連結： http://bit.ly/2kYsw8E ），祥嫂開口中，兆尊近日積極重投工作，繼月前拍攝電影《失業皇帝2017》後，離開電視圈8年嘅佢又重投電視懷抱，為奇妙電視主持全新節目《Learning 男》，新節目7月底就會推出，內容係講佢同曾志豪、李尚正上堂學習唔同課程。

鄧兆尊今日中午同李尚正、曾志豪及「戀愛導師」劉奇諾喺觀塘拍外景。拍攝開始前三個主持先企定定聽導師講解，然後要喺街頭度問女仔攞電話。結果兆尊分別向三位唔同年齡嘅女士埋手，首先佢成功向一位較年長嘅女士抄牌，但第二位妙齡少女就拒絕，到最後再挑戰另一位年紀細啲嘅學生埋手，收復失地，三個入面成功咗兩次。

拍攝前兆尊就話今次節目要學點識女仔，好高難度。係，你冇睇錯，兆尊真係話識女仔難：「我呢啲學咗前面後面，無學點飛女，講笑啫。」

兆尊又話呢個節目係學點樣去充實自己，同埋學識女仔要有啲咩步驟。問到兆尊仲記唔記得以前點問女仔攞電話？佢話：「冇呀，唔記得喇，其實今日我都係負責做條脷，即係主力搭吓嗲，人哋一見到我就知道係偷拍啦。」

兆尊透露節目入面要佢哋幾個每日都學唔同嘅嘢，好似今朝先學完魔術。咁如果三位紅顏知己知道後，會唔會有壓力？兆尊話：「我同佢講全部都係男主持無女仔，佢哋都唔信我會啦（識女仔），都唔敢。」

咁你啲紅顏知己覺得你識女仔技術高唔高？佢話：「唔高，因為我淨係識得識女仔，唔識得飛，食咁多會好滯㗎。」咁o依家三個喎，係咪好滯？佢苦笑話：「你睇我，我唔會再重複犯錯㗎啦。」兆尊透露今日已經係第二日開工：「噚日第一日開工就玩水上瑜伽，結果曬到手臂紅晒，總共有13集每日要學四個唔同嘅item。」

除咗奇妙電視節目外，佢又透露遲啲會同阮兆祥合作一個搞笑嘅綜藝節目，會喺大陸拍攝。最近有冇祥嫂見面？佢話：「我好忙都唔得閒，佢都好忙。」至於永祥館嘅進展如何佢話：「呢啲通常女人做，我好少理，但相信進展應該好順利。」