【李八方online】楊岳橋留鬚新造型 粉絲《佬訊》都唔like
楊岳橋留鬚佬訊
講起鬍鬚,大家諗起歌手林子祥,抑或前財爺曾俊華?斷估唔到聯想到平時官仔骨骨青靚白淨嘅楊岳橋啩!咁如果岳少真係留鬚,大家又點睇?
AY近日唔知受咗乜嘢刺激呢,喺個人IG放咗張新相,令大家「耳目一新」,皆因相中嘅佢如常有鬼馬表情外,仲要係,有鬚嘅(唔好錯fo,集中睇佢隻手指)。無錯,係滿面鬍鬚嗰隻。睇返粉絲留言,普遍唔多讚好,有人直指「好‧恐‧怖」、「呢個造型唔啱你」,另有人眼光獨到,一「絲」不苟叫AY,「麻煩議員拎啲鬚植上頭」。
咁專業界又點睇?《佬訊》喺Facebook轉貼AY留鬚相,好體諒咁話喎:「人一世物一世,總會想留一次鬚。但諸君要知道,full beard是很講求天份的」,強調一道完滿嘅Full beard,只有鬍鬚茂盛嘅佬先玩得起,「不夠濃密的full beard,就像中佬色彩繽紛的Air Max一樣,都是trying too hard,over咗。」,總結係:「full beard真係唔啱你(AY)」,強烈建議AY剃鬚,「貪玩是可以,但要小心玩出禍,失去了青靚白淨的精英形象,嚇跑一眾師奶少女fans啊!」
嘩,乜一堆鬚都有咁大影響,大家係咪開始替AY擔心?hashtag嗰句「又P得幾好」,認真你就輸?