五月天迪士尼之約，噚晚頭場順利完成，二萬人順利入場，亦在人流控制下順利離場。天公造美。「雨神」阿信為大家帶來驚喜。

五月天在完騷後，也於fb出post，感謝大家：「首場香港戶外大型演唱會成功！就在香港迪士尼與你一起做夢！五月之約無限放大，你的回憶是否無限精彩？首場的大家都來留言吧！」另特別感謝香港警務處、消防處、民航處、兩家巴士公司、港鐵，當然還有迪士尼。

但噚晚，其實發生了一些頗不愉快嘅事，就係有人不守規矩。唔係一個，而係大批。五個字形容：動物大遷徒。

如果要動感一啲嘅，四個字：屍殺列車。
「我絕對懷疑呢個演唱會係自由席。開場冇耐我已經好大聲鬧嗰啲人……真心恐怖，由A3開始打後啊block向前衝出嚟，竟然仲有人抱小朋友跑出去，我幾驚如果有咩事人踩人個 concert 要腰斬。」
「$480表示睇住側邊$880屍殺列車咁跑去$1,180度。」
「動物大遷徙咁，對$1,180嘅同事造成困擾。」
「$1,180都勁多人衝去延伸台囉！仲要趕都唔走~~」
「我明明係AQ排，通道後第3行，突然變哂F區。」
「我哋伸展台附近既都係受害者！！！真係無諗過會咁！」
「有冇見過有人離表離到上張凳到都冇人阻止佢？我見過，我真係見過！利申坐b1，前後左右都係操流利普通話口音並刷朋友圈嘅。」

另一個問題，係現場維持秩序嘅工作人員嚴重不足，而且欠缺如紅館控制人潮的專業經驗：
「俾紅館少勁多工作人員」
「啲工作人員好似part-time，唔係專業架，好似！」
「其實我係散場先見到有保安。演出期間無見到保安或工作人員！」
「消失的保安……唔好話開場，入場入到一半都已經唔見咗人。」
「連保安都影相同拍片。」
「一入場已經有班人圍住個延伸台企，我哋喺延伸台第一行，咪捉住實Q勁投訴。同黑衫啲Part time講係冇用0架，好彩有個真係有心做嘢嘅綠色衫uncle趕返晒啲人返埋位，先無咁離譜。」

你是否也是其中一個受害者？