陳志雲早前喺無綫資深化妝師Gary追思會上，與昔日愛將崔建邦相遇，有指當時兩人冇打招呼，好似唔識咁，關係不再。

阿邦今日喺尖沙嘴出席一個活動，咁啱遇到陳志雲現任愛將王喜，佢哋喺活動上冇乜交流，唔通真係咁尷尬﹖但點知...活動結束之後，見到阿邦同王喜雞啄唔斷，好好傾喎，之後仲好大方影合照，王喜講笑咁話呢張係世紀合照。

接受訪問時，阿邦透露同陳志雲有message聯絡：「有約食飯，但仲未食；其實上次喺喪禮上，我係有同佢點頭，我一直都想講，佢係我恩師，唔係佢我都入唔到呢行。」

陳志雲婉拒你唔同你食飯﹖阿邦笑話：「我唔知，你幫我問佢。」冇心病﹖阿邦話：「Stephen(陳志雲)上次都講，有啲朋友唔係成日見，我有約佢食飯，睇佢幾時得閒，大家聚下。」叫埋王喜食飯﹖阿邦即刻話：「可以0架！」