【fb直播少主沖涼】街坊聞事件怕怕:小朋友都有私隱
洗澡印傭赤裸
一名印傭在facebook直播她替3名年約7、8歲男女少主洗澡的過程,其間3名小童全身赤裸暴露於鏡頭前,經網絡傳開。部份家長直指涉事傭工的做法不當,擔心事件發生在自己小朋友身上;更有家長透露小朋友在嬰孩時,也曾遭傭工拍攝裸體,但相信對方非刻意,故未有報警。
家長劉小姐知道今次事件後,大表驚訝說:「(直播小朋友沖涼)梗係唔可以啦,咁肉酸,小朋友都有私隱嘛,如果發生都會報警。」她又透露:「我傭工都試過影小朋友無着衫,但就係BB仔時,唔係突登。」
王先生和鄭太也表示:「咁唔好囉,都擔心呢樣嘢。」王先生更指原本打算稍後聘請外傭,照顧小朋友,「惟有留意多啲,講番規矩要佢(外傭)遵守番囉。」
另一名廖女士則指,本港僱主不滿外傭表現的事件時有所聞,形容「呢啲(直播小朋友沖涼)都唔算誇張」,但認為有關事件不應發生,「咁緊係唔可以啦,有私隱嘛。以前會由家傭幫小朋友沖涼,而家我會幫小朋友沖。」
王先生和劉小姐指直播小朋友沖涼不應該,擔心事件發生在自己小朋友身上。(司徒韋桐攝)