小妹有唔少friend都鍾意打機，有啲仲打得好專業，玩到打比賽㖭。電子競技（e-sport）喺中國大陸、台灣，以至歐美都好流行，香港開始興起，2014年亞運會仲將電競列入運動項目㖭。提起台灣，電腦周邊產品商Gigabyte技嘉公司上月底舉行「頂級遊戲配備世界巡迴展」，兩個月內遊走全球13個城巿，首站喺台北，噚日殺到嚟香港。小妹當然要到場收吓料。

超頻顯示卡系列強化3D

Gigabyte行銷處處長林英宇（Eddie）話，香港機迷都好厲害，技術可以同世界接軌，所以對周邊遊戲配備嘅要求越嚟越高。利用個人電腦打機，想贏對手，最基本有一張好好嘅顯示卡。Gigabyte推出SuperOverclock超頻顯示卡系列，針對玩家需要，加強畫面嘅3D立體感、效能同散熱，好似皇牌GTX470顯示卡，效能較同級高12%，耗電量少咗18%，溫度低17%；玩家又可以因應需要，面對唔同對手，選擇超頻模式、遊戲玩家模式（標準模式）同節能低碳模式，「有了這張卡，玩家可以享受極速快感」。
Eddie話，Gigabyte同場推出AivaiK8100電競手感鍵盤，全球最快滑鼠M8000X，玩家打機可謂如虎添翼，「每個按鍵的彈力會根據不同手指設計，好像尾指力道會較其他手指弱，有關按鍵只需較小的力便可按下」。小妹聽佢咁講，想做一個電玩高手都唔簡單。