中原地產報告皇后大道中九號（皇九）某單位以呎租十八元出租，計埋免租期四個月，有效租金（effectiverent）係十六元二角，算係中環甲級寫字樓嘅最低租金水平。皇九嘅建築好靚，位置唔曳，點解租金咁平呢？又有「屋之島」報告說皇九嘅空置率高達兩成三，高到嚇親人啫？
冇理由建築好、位置靚、租金便宜嘅寫字樓冇人吼嘅噃？但以香港商人嘅精明，斷唔會大隻蛤乸隨街跳嘅噃，唔通呢間大廈風水曳？
於是打電話畀業餘風水師財務T，佢啱啱與大水喉合組新公司，搬入中銀大廈，事先睇過三十幾個寫字樓單位，對新行情好熟。財務T話：「皇九風水唔可以話唔得，要逐個單位睇，再配上主事人嘅命盤先至可以講好壞，但好難一時之間講得清楚畀你聽。咁啦，明年發財方向係門口向東南或西北，你亦應該朝此方向坐。」
講得咁少，好難完全明白啫。哈，有咁啱得咁蹺，大編輯送嚟一本新書，名為《中州派風水常識》，作者談若樨，係談錫永（筆名王亭之）嘅千金。據作者簡介話：談小姐自少隨父親學習中州派斗數與風水，研習古籍，在夏威夷大學攻讀建築，旨在將建築及室內設計與風水配合。談小姐可謂盡得王亭之真傳，喺多倫多《明報》地產版寫咗三年風水專欄，呢本書就係專欄嘅結集。呢本書來得正合時宜，趁新年假期，睇呢本書既可消閒，亦可增進風水常識㖭。