【本報訊】繼號召明星名人拍片，醫院管理局再以離地方式，為前線醫護人員打氣。屯門醫院兩周前舉行「小食打氣日」，為同事提供免費魚蛋燒賣等小食。有醫生表示，「我做嘢做到連正餐都冇得食，你叫我食魚蛋燒賣，你係唔係整蠱我呀」。

於屯門醫院內科任職的醫生黃任匡表示，該院約兩周前舉辦小食打氣日，免費請同事食魚蛋燒賣等，並於電郵中指當日會有聯網高層為同事送上小食打氣，「我做嘢做到連正餐都冇得食，你叫我食魚蛋燒賣，你係唔係整蠱我呀。究竟諗呢啲嘢出嚟嘅人，幾耐冇上過病房，先會諗得出呢啲嘢？」

人口政策影響醫療需求

醫院為響應環保，叮囑同事自備餐具，「我係咪帶埋刀叉去巡房，巡完房唔食飯去食魚蛋燒賣？」同事不忿資源浪費在這些地方，而非實際改善醫療服務，「同事嬲係覺得醫管局食衞局離地到好匪夷所思」。就像早前管理層請明星拍片打氣，「當我做到死，尿唔得閒屙，飯唔得閒食，我實會因為睇咗譚詠麟條片而會開心咗啦」。

黃指，現時看不到公立醫院服務有改善轉機，申訴大會上不少同事提及人口政策問題，「只會預計到每日150個人落嚟，情況只會越嚟越嚴重，對醫療服務需求只會越嚟越大，𠵱家爆滿嘅情況只會越趨嚴重」。以往病房爆滿時，醫院會發出警報（alarm），提醒同事情況嚴峻。「以前呢個係非常時期會響嘅警報，𠵱家日日響，變咗響alarm響到大家冇感覺」。 他希望管理層想出長遠解決辦法，非年年叫同事「賣血」。

■記者陳沛冰