當年今日
關於我們

【誘因唔大】有項外地賽事 難吸納香港馬參與!

蘋果日報 2018/03/03 11:20

澳港盃賽馬日冷場澳港盃阿Joe

今日(3日)沙田有十場日馬,聽日就越洋轉播澳門「澳港盃賽馬日」七場賽事,馬迷唔愁冇得玩。
澳港盃係香港同澳門賽馬年度埠際賽嘅一部份,近季香港馬都冇乜意慾過大海爭盃,今年最終只得兩隻馬成行,無疑令呢項賽事越嚟越失色,始終兩地賽事投注額及受關注程度差距太大,澳門馬會當然希望可維持舉辦澳港盃,但對香港馬會而言,卻是可有可無。
港澳馬匹實力差距大,近季願意去跑澳港盃嘅香港馬,唔係最頂尖,亦造成澳港盃越趨降格。
今屆「醒目名駒」 同「萬馬飛騰」季內未交出頭馬,廐主告仔同方仔可能都計過數,知道喺香港難贏,過澳門跑可能有機會執番場頭馬,無疑「醒目名駒」較值得睇好,睇吓可唔可以再作客捧盃。
或者香港馬會私下都希望多啲馬參與澳港盃,唔想俾人覺得唔尊重主人家,但練馬師同馬主冇實際行動支持,馬會都冇得強人所難。
練馬師同馬主冇興趣玩,當然有其他考慮,事實澳港盃獎金唔算特別吸引,若果旗下馬喺本地賽事夠贏,獎金又差不多,真係唔需要勞師動眾過澳門。
早前都講過馬會嘅賽事編排因循守舊,近幾個賽日編排嘅高班賽事,已經有好幾場出現少馬嘅冷場,今日兩場二班賽都出馬唔足,其中第三場更加只得七隻馬跑。
連本地嘅高班賽都冇乜馬報名出賽,練馬師更加唔會派馬跑澳港盃。最慘係少馬場合唔代表賽果正路,往往呢啲場次先爆到七彩,馬會真係要調整吓啲編場方針。
其實馬會有越洋轉播賽日空間,點計都值得保留轉播澳港盃賽日受注,話晒馬迷對澳門馬匹同騎練都比較熟悉,比起轉播澳洲馬隔山買牛,馬迷都會揀玩澳門馬。
阿Joe