通常利物浦嘅救世主都會係謝拉特，估唔到日前歐冠盃外圍賽對海法馬卡比，救番「紅軍」嘅會係謝拉特「替身」、後備上陣嘅麥克干沙利斯，佢上陣兩分鐘後建奇功，真係令球迷對佢印象大大加深。
22歲嘅麥克仔到比賽後段先至入替謝拉特，估唔到上陣短短兩分鐘，就幫利物浦射入反敗為勝嘅一球，一控一射都盡顯呢位智利小將功架，喺咁重要時刻射入咁重要入球，點會唔令「紅軍」球迷對佢留下深刻印象呢？
講到麥克干沙利斯，其實佢上季已經加盟利物浦，因為申請唔到工作證，最後借番去西班牙效力皇家蘇斯達，而去季就幫皇蘇射入咗5球，尤其季尾連續3場對皇家馬德里、桑坦德同埋維拉利爾都有入球，算係球隊護級功臣之一；今季成功攞到工作證歸隊，第一場正式比賽就立大功，睇嚟前途無可限量。