當年今日
關於我們

【有危就有機】李雨陽正值抗爭升級開分店 一日得幾百蚊生意

蘋果日報 2019/11/23 06:00

李雨陽

李雨陽曾因拍攝青春偶像劇被捧紅一時,少年得志令他飽嘗挫敗,廿歲出頭欠債40萬,窮到賣雞、做馬會、售貨員跑數。坎坷過後慶幸能夠大翻身,如今不僅成為一家之主組織家庭,還開食店做老闆,夫唱婦隨拍住上開檔,不足一年在逆巿搏殺再開分店,曾經谷底李雨陽希望香港人能發揮團結、捱得、抵諗精神,令街上旺舖重現。
現年40歲李雨陽歷盡滄桑,外表比以前顯然成熟,闊別香港娛樂圈一段日子,現在無債一身輕,大半年前在觀塘投資開設泰式食店,經連月抗爭運動慶幸生意仍能撐住自負盈虧,近日低谷入手以接近7位數在深水埗再開食店,在逆市中冒險開業預咗要守,富貴險中求認為有得博,並說:「有危就有機,大家都退嘅時候我哋進可能有先機,如果社會問題經過某一段時間解決到,所有嘢都會緩和上升,想再頂一間類似舖頭就唔係呢個價錢。」由10月中開業初期,由於正值抗爭運動升級,最初一日得幾百元生意,李雨陽曾捧着串燒到街上宣傳可惜都乏人問津而回,接近一個月生意額才有上調,吸取人生經驗的李雨陽堅持力不到不為財,同時不想加入失業潮,現時樓面、水吧、收銀加宣傳一腳踢。
從藝人轉投飲食業李雨陽感覺比以前辛苦,但體能上消耗不同,他說:「 以前拍戲4、5點起身到凌晨12點先收工,攰得嚟好開心有滿足感;做飲食業刻板,每日返工收工時間一致。返過內地再返香港工作又係兩樣嘢,香港工作開心嘅係可以返屋企睇小朋友,唔需要離開一頭半個月,收工視頻屋企同囝囝講好掛住佢,可以返去攬住個仔。」現時身兼老闆、藝人兩份工作,近日為開電視節目《Fit開有條路》擔任主持,經歷種種風雨過後,李雨陽視現階段是人生一個圓滿:「有自己家庭,娶咗老婆生咗個仔一家三口好開心,太太同小朋友係我動力,幾推動到我向前行,做每一樣嘢同決定都會諗屋企先。」
回望過去李雨陽出道後接拍偶像劇《當四葉草碰上劍尖時》,角色設定長髮造型演富家公子,效果十足十當年爆紅台劇《流星花園》中的道明寺,迷倒不少港女而一時走紅,可惜後勁不繼,李雨陽自我安慰說:「我幾有香港人優點,馬死落地行,因為曾經經歷過自己人生高峯,拍完第一套電視劇《四葉草》出嚟效果非常之好,由一個死靚仔乜都唔識,突然間行出街口都要十幾20分鐘,喺女人街都要廿分鐘前呼後擁呢邊影張相。當時後生調節唔到,之後冇乜工作量,心態受之前影響覺得開始上,但收入同開支不一,成日抱住僥倖心態,而家唔得,下個月會得,慢慢開始信用卡欠債,飲飲食食,日常開支,着衫又唔可以冇牌子,你睇發哥(周潤發)反璞歸真着一件普通底衫你唔覺得有啲乜,當時我會諗未係發哥呢個位喎,會用另外一啲嘢去包裝自己,入不敷支情況下債台高築。」
畢生難忘經歷由此起,甚麼驅使李雨陽乜都撈?正正是最現實的「窮」字,勝在他能放下身段,曾做過售貨員、賣雞、馬會電話投注,他對做馬會投注時的對白仍記憶猶新:「係,你好!今晚買咩波?邊場波膽大細?」其間轉投王維基旗下HKTV做包薪演員,3至6個月後有穩定糧單就去財務公司債冚債,他憶述說:「每月跑數還債,當時都好窮,一日三餐食得一餐,最窮時,唔出街就唔使用錢。」後來曙光終於出現,到內地工作後生活開始解困,拍一套微電影或網劇可以還足幾個月債,改善生活後還儲到一筆錢結婚成家。
放下身段投身基層工作,李雨陽認為心態最重要,他說:「唔好覺得自己有咩咁巴閉高高在上,放開啲嚟睇你都係一個人,每樣嘢都係一個職業,如果有框架思想局限自己你好難行出一步,唔如意或者谷底更要放鬆。」還看今朝自己衰乜?李雨陽語帶悔疚:「樣樣都有啲,主要自己問題,每一個人點解生活到咁,要睇返自己,唔關命運際遇 ,好多前輩都話機會係畀有準備嘅人,嗰時我諗咁紅行一條街都廿分鐘40、50人搵我影相,我仲唔係ready咗?有咩戲畀我做唔得呀?但就係啲戲唔得,就係冇經驗,冇技術冇演技。當其時目空一切,企喺山峯向下望,點睇到自己有問題 ,回望先知自己係點。 」

採訪:卓寶花
攝影:林賓尼
---------------------------------
《迪士尼公主大世界》
14位公主一書睇晒
-----------------------------
【撐學生】
召集有心人 撐學生全年睇《蘋果》
立即按此