有錢可能真係大晒㗎！《ESPN》引述意大利《米蘭體育報》報道，德甲多蒙特嘅奧巴美揚成為最新一位有可能畀天價轉會費買斷，從而投身中超嘅球員，如果事成嘅話，唔單止會打破轉會費世界紀錄，就連球員人工嘅紀錄都會破埋。

報道指過往曾經同皇家馬德里以及曼城扯上關係嘅奧巴美揚，成為中超上海上港嘅羅致目標，據報上港肯出嘅轉會費達到1億5,000萬歐元，即係超過12億港紙，如果奧巴美揚轉會嘅話，每年人工亦會有4,100萬歐元。27歲嘅奧巴美揚今季喺各項賽事替多蒙特上陣21場，取得22個入球，佢今個月會暫時離隊，代表東道主加蓬參加非洲國家盃。