【李八方online】泰王10月下葬 港旅行團都要調行程
10月又係外遊旺季,康泰旅行社董事及行政總裁黃進達話,因為天清氣爽,日韓又有櫻花,另一旅遊熱點泰國亦少雨及冇咁熱,但如果10月尾去泰國就要留意,因為舊年10月駕崩嘅泰王蒲眉蓬,會喺10月25日至29日舉行葬禮,期間旅客最好同當地人一樣着素色衫及注意言行舉止,部分景點例如大皇宮和玉佛寺都會暫停開放,所以康泰曼谷旅行團果幾日都會調動行程,唔去部分景點,或避開去曼谷周邊新景點或芭堤雅。
自由行去當地都要留意,尤其係10月26日嘅最重要火葬典禮,多國元首領袖都出席,尊敬泰王嘅泰國人亦會去觀禮,市面會有交通管制。當日仲列為公眾假期,有啲店舖都可能停開。不過,根據去年駕崩經驗,對旅客影響始終有限。
黃進達又話,今年國慶中秋假期相近,令整體報團量都多咗,而聖誕團部分更加已經開始有人報,農曆年巴西嘉年華團更已可成團,顯示香港人更加鍾意外遊,亦因為去多咗,旅行社就要諗新景點,包括景色美麗、可代替暫停開放九寨溝嘅四川稻城亞丁,及東歐國家等,而且,亦都增加泰國、台灣、日韓純玩一天遊吸引自由行客。